Persentasie – Vermeerdering en Vermindering

Hoe bepaal jy ‘n item se prys as daar ‘n persentasie vermeerdering of vermindering is? Met ander woorde, hoeveel moet jy betaal as daar afslag is of as daar ‘n vermeerdering in prys is? Om die nuwe waarde te bepaal, kan ons van twee metodes gebruik maak. Kom ons kyk na die voorbeeld van ‘n 15% prysvermindering op skoene wat R800 kos. In die eerste metode moet ons eers uitwerk wat 15% van R800 is. Om dit te doen kan ons die 15% skryf as 15 gedeel deur 100 en die “van” kan ons verander in ‘n maalteken. 15 gedeel deur 100 maal met R800 is R120. Beteken dit dat die nuwe prys van die skoene nou R120 is? Nee, dit beteken dat jy R120 afslag kry op R800. So jy betaal R120 minder, wat op ‘n bedrag van R680 neerkom. Die tweede, korter metode om by die antwoord uit te kom is om te dink dat as jy 15% minder moet betaal, jy inderwaarheid 85% van die oorspronklike bedrag moet betaal. So, as jy 85% van R800 uitwerk, sal jy ook ‘n antwoord van R680 kry. Wanneer daar ‘n persentasie vermeerdering is kan jy enige van die twee metodes toepas soos bespreek hierbo. Onthou net, met persentasie vermeerdering, moet die bedrag wat jy op die ou einde betaal meer wees as die oorspronklike bedrag. En, as daar ‘n vermeerdering van 15% is, beteken dit dat jy 115% van die oorspronklike bedrag moet betaal.